Stolt fiskematprodusent sidan 1948
Om oss
Brødrene Hjønnevåg AS er ei tradisjonsrik bedrift som produserer og sel sjømat til daglegvarebutikkar, grossistar og storhushald i heile Noreg.
Hjønnevåg har i dag 10 tilsette og har ei omsetning på ca 30 millionar kroner.
Historia
Henrik B. Hjønnevåg starta bedrifta under namnet H.B. Hjønnevåg.
Henrik Bastiansen Hjønnevåg kom frå Solund i Sogn og Fjordane. Der dreiv han med transport av fisk i brønnbåt, hovudsakeleg frå Solund til Bergen. I 1939 kom han med familien sin til Uskedalen. (Uskedalen ligg i Kvinnherad kommune i Sunnhordland.) Her fortsette han med fisketransporten fram til krigen. Då konfiskerte tyskarane båten hans.
Han tok seg arbeid på hermetikkfabrikken i Uskedalen, der han jobba til 1948. Då starta han si eiga fiskematbedrift i Rosendal.
I 1951 bygde han seg hus i Uskedalen på Eikelandet. Her innreia han produksjonslokale i kjellaren på ca 35 kvadratmeter. No blei også kona, Gudrun Karina, med i produksjonen.
På grunn av auka omsetning blei det behov for større produksjonslokale etter kvart. I 1958 bygde Henrik nytt produksjonslokale ved sjøen på Eikelandet i Uskedalen, og fekk no 85 kvm. til disposisjon. Henrik og Gudrun sine søner Alf og Harald vart også med i produksjonen, og etter kvart så vart det nødvendig å tilsetje ytterligare to medarbeidarar.
Harald og Alf.
I 1962 overtok Alf og Harald bedrifta, og bedrifta skifta namn til Brødrene Hjønnevåg. I 1968 ble produksjonslokala utvida med ytterligare 115 kvm., til 200 kvm. totalt. Ein fekk no ein heilt avskilt fiskematavdeling, betre kjølemuligheiter og fryserom.
Hjønnevåg blei aksjeselskap i 1977, og aksjane ble delt likt mellom Alf og Harald Hjønnevåg, sønene til Henrik og Gudrun.
Dei eksisterande produksjonslokala blei nok ein gong (1981) for tronge og for urasjonelle. Dette pga stadig aukande omsetning. Alternativet for bedrifta blei å byggja heilt nye lokaler. Hausten 1982 fekk bedrifta tomt på Børnes Industriområde, ca 1 km sør for dåverande produksjonslokale. Det nye produksjonslokalet var innflyttingsklart i november 1983. No hadde bedrifta 400 kvm. til disposisjon.
I 1989 blei denne bygningen ytterligare utvida med 150 kvm.
Seinare har ein fått ny lagerhall og nytt kjølerom.
Marit.
Marit Hjønnevåg overtok som dagleg leiar og hovudaksjonær i bedrifta i 2003.
I 2004 starta ei stor utviding og oppgradering av produksjonslokala. Totalt er det no 1200 kvm med produksjonslokale(2021). Både i 2014 og i 2021 gjorde bedrifta ei relativ stor ombygging inne i lokala for å ruste opp for ferdigpakka produkt og oppgradering for framtida.
Hjønnevåg har 2 eigne kjølebilar til distribusjon. Mykje av varene går også med leigetransport.
Sjømat NM.
Utmerkelsar:
NM i Sjømatprodukt
2001: 2. plass Fiskepudding
2002: 2. plass Fiskekaker
2004: 2. plass Fiskepudding
2006: 3. plass Fiskepudding
2008: 2. plass Fiskepudding
2011: 2. plass Fiskepudding
2011: 3. plass Fiskekaker
2013: 1. plass Fiskepudding
2013: 2. plass Gourmetburger
2015: 2. plass Fiskekaker
2018: 1. plass Fiskepudding
2018: 2. plass Fiskeburger m ost og bacon
2021: 1. plass Fiskepudding
2021: 1. plass Varmrøykt krydderlaks
2023: 1. plass Fiskepudding
2023: 2. plass Fiskekaker
2024: 1. plass Peppermakrell
2024: 2. plass Fiskepudding
Framtida.
I ei tid der pris ofte er den avgjerande faktor, satser vi i Hjønnevåg på kvalitet og held oss tru til våre annerkjente og prisbelønte resepter.